Stock Market Highlights: ಭಾರತದ ಷೇರು ಮಾರುಕಟ್ಟೆ ಸೋಮವಾರ ಭಾರೀ ಕುಸಿತಕ್ಕೆ ಸಾಕ್ಷಿಯಾಗಿದ್ದು, ಸೆನ್ಸೆಕ್ಸ್ 500ಕ್ಕೂ ಅಧಿಕ ಪಾಯಿಂಟ್ಸ್ ಇಳಿಕೆಗೊಂಡಿದೆ. ಒಂದು ಹಂತದಲ್ಲಿ 900 ಪಾಯಿಂಟ್ಸ್‌ವರೆಗೆ ಇಳಿಕೆಯಾಗಿದ್ದ ಬಿಎಸ್‌ಇ ಸೂಚ್ಯಂಕವು ಕೊನೆಗೆ ಚೇತರಿಕೆ ಸಾಧಿಸಿ 511 ಪಾಯಿಂಟ್ಸ್ ಇಳಿಕೆಯಾಗಿ 81896 ಮಾರ್ಕ್‌ನಲ್ಲಿ ಮುಚ್ಚಿತು.
ಇದೇ ವೇಳೆಯಲ್ಲಿ ನಿಫ್ಟಿ50 ಸೂಚ್ಯಂಕವು 140 ಪಾಯಿಂಟ್ಸ್ ಅಥವಾ 0.56 ಪರ್ಸೆಂಟ್ ಇಳಿಕೆಯಾಗಿ 25,000 ಗಡಿಯಿಂದ ಕೆಳಗಿಳಿದಿದೆ ಹಾಗೂ 24,971.90 ಮಾರ್ಕ್‌ನಲ್ಲಿ ಕೊನೆಗೊಂಡಿದೆ.
ಬಿಎಸ್‌ಇ ಮಿಡ್‌ಕ್ಯಾಪ್ ಹಾಗೂ ಸ್ಮಾಲ್‌ಕ್ಯಾಪ್ ಸೂಚ್ಯಂಕಗಳು ಔಟ್‌ಪರ್ಫಾಮೆನ್ಸ್ ನೀಡಿದ್ದು, 0.20 ಪರ್ಸೆಂಟ್ ಮತ್ತು 0.57 ಪರ್ಸೆಂಟ್ ಏರಿಕೆಯಾಗಿದೆ.
ಬಿಎಸ್‌ಇ ಲಿಸ್ಟೆಂಡ್ ಕಂಪನಿಗಳ ಮಾರುಕಟ್ಟೆ ಮೌಲ್ಯವು ಬಹುತೇಕ ಬದಲಾವಣೆ ಆಗದೆ 448 ಲಕ್ಷ ಕೋಟಿ ರೂಪಾಯಿಗಳಲ್ಲಿ ಉಳಿದಿದ್ದು, ಸ್ಮಾಲ್‌ ಕ್ಯಾಪ್ ಹಾಗೂ ಮಿಡ್‌ ಕ್ಯಾಪ್ ಸೆಗ್ಮೆಂಟ್‌ನ ಚೇತರಿಕೆಯಿಂದಾಗಿ ಏರಿಕೆ ಕಂಡಿದೆ.
ಭಾರತದ ಷೇರು ಮಾರುಕಟ್ಟೆ ಕುಸಿತಕ್ಕೆ ಕಾರಣಗಳು
1) ಇಸ್ರೇಲ್-ಇರಾನ್ ಯುದ್ಧ : ಇರಾನ್ ಮೇಲೆ ಅಮೆರಿಕಾದ ದಾಳಿ
ಇರಾನ್-ಇಸ್ರೇಲ್ ನಡುವಿನ ಉದ್ವಿಗ್ನತೆ ಮತ್ತಷ್ಟು ಹೆಚ್ಚಳವಾಗಿರುವುದು ಹಾಗೂ ಅಮೆರಿಕಾವು ಇರಾನ್‌ನ ನ್ಯೂಕ್ಲಿಯರ್ ಫೆಸಿಲಿಟಿಗಳ ಮೇಲೆ ಏರ್‌ಸ್ಟ್ರೈಕ್ ಮಾಡಿರುವುದರಿಂದ ಮಧ್ಯಪ್ರಾಚ್ಯದಲ್ಲಿ ಬಿಕ್ಕಟ್ಟು ಮತ್ತಷ್ಟು ಹೆಚ್ಚಾಗಿದೆ.
ಭಾನುವಾರ ಬೆಳಿಗ್ಗೆ ಯುಎಸ್ ಇರಾನ್‌ನ ಮೂರು ನ್ಯೂಕ್ಲಿಯಲ್ ಸೌಲಭ್ಯಗಳ ಮೇಲೆ ವಾಯು ದಾಳಿ ನಡೆಸುವ ಮೂಲಕ ಧ್ವಂಸಗೊಳಿಸಿರುವುದಾಗಿ ಘೋಷಣೆ ಮಾಡಿತು. ಇದ್ರಿಂದ ಮಧ್ಯಪ್ರಾಚ್ಯದಲ್ಲಿ ಬೆಂಕಿಗೆ ತುಪ್ಪ ಸುರಿದಂತಾಗಿದೆ.
ಒಂದು ವೇಳೆ ಇರಾನ್ ಅಮೆರಿಕಾದ ಸೇನೆ ಮೇಲೆ ದಾಳಿ ನಡೆಸಿದ್ದೇ ಆದಲ್ಲಿ ಪರಿಸ್ಥಿತಿ ಮತ್ತಷ್ಟು ಬಿಗಡಾಯಿಸಲಿದೆ ಎಂದು ತಜ್ಞರು ಅಭಿಪ್ರಾಯ ಪಟ್ಟಿದ್ದಾರೆ. ಇದ್ರ ಜೊತೆಗೆ ಇಸ್ರೇಲ್ ಕೂಡ ಇರಾನ್ ಮೇಲೆ ದಾಳಿ ಮುಂದುವರೆಸಿದೆ.
2) ಪ್ರಮುಖ ತೈಲ ಸಾಗಾಣಿಕೆ ಜಲಸಂಧಿ ಹರ್ಮುಜ್ ಮುಚ್ಚುವ ಬೆದರಿಕೆಯೊಡ್ಡಿದ ಇರಾನ್
ಮಾಧ್ಯಮ ಪ್ರಕಟಣೆಗಳ ಪ್ರಕಾರ, ಇರಾನ್ ಸುಪ್ರೀಂ ನ್ಯಾಷನಲ್ ಸೆಕ್ಯುರಿಟಿ ಕೌನ್ಸಿಲ್‌ ಜಗತ್ತಿನ ಪ್ರಮುಖ ತೈಲ ಸಾಗಾಣಿಕೆ ಜಲಸಂಧಿಯಾಗಿರುವ ಹರ್ಮುಜ್ ಮುಚ್ಚುವ ಬೆದರಿಕೆಯನ್ನು ಒಡ್ಡಿದೆ. ಬ್ಲೂಮ್‌ಬರ್ಗ್ ವರದಿ ಪ್ರಕಾರ ಈ ಜಲಸಂಧಿಯು ವಿಶ್ವದ ತೈಲ ಸಾಗಣಿಕೆಯ 5/1 ಭಾಗವಾಗಿದ್ದು, ಭಾರತವು ಸುಮಾರು 40% ಕಚ್ಚಾ ತೈಲವನ್ನು ಇದೇ ಮಾರ್ಗದ ಮೂಲಕ ಆಮದು ಮಾಡಿಕೊಳ್ಳುತ್ತದೆ.
ಒಂದು ವೇಳೆ ಇರಾನ್ ಹರ್ಮುಜ್ ಜಲಸಂಧಿಯನ್ನು ಮುಚ್ಚಿದ್ದೇ ಆದಲ್ಲಿ, ಕಚ್ಚ ತೈಲ ಪೂರೈಕೆಯಲ್ಲಿ ಭಾರೀ ವ್ಯತ್ಯಯವಾಗಲಿದ್ದು, ಕಚ್ಚಾ ತೈಲ ಬೆಲೆಯು ತೀವ್ರವಾಗಿ ಏರಿಕೆಯಾಗಲಿದೆ. ಇದ್ರಿಂದ ಭಾರತದಂತಹ ಪ್ರಮುಖ ತೈಲ ಆಮದು ರಾಷ್ಟ್ರಗಳ ಆರ್ಥಿಕತೆಗೆ ತೀವ್ರ ಹೊಡೆತ ಬೀಳಲಿದೆ.
3) ಕಚ್ಚಾ ತೈಲ ಬೆಲೆ ಪ್ರತಿ ಬ್ಯಾರೆಲ್‌ಗೆ $80ರ ಸಮೀಪ
ಮಧ್ಯಪ್ರಾಚ್ಯದಲ್ಲಿನ ಸಂಘರ್ಷದಿಂದ ಕಚ್ಚಾ ತೈಲ ಬೆಲೆಯು ಪ್ರತಿ ಬ್ಯಾರೆಲ್‌ಗೆ $80ರ ಗಡಿಯನ್ನು ದಾಟಲಿದೆ ಎಂದು ಮಾರುಕಟ್ಟೆ ತಜ್ಞರು ಅಭಿಪ್ರಾಯ ಪಟ್ಟಿದ್ದಾರೆ. ಇದ್ರಿಂದ ಕಚ್ಚಾ ತೈಲವನ್ನು ಹೆಚ್ಚು ಆಮದು ಮಾಡಿಕೊಳ್ಳುವ ರಾಷ್ಟ್ರಗಳ ವ್ಯಾಪಾರ ಕೊರತೆ ಹೆಚ್ಚಾಗಲಿದೆ.
ಕಚ್ಚಾ ತೈಲ ಬೆಲೆ ಏರಿಕೆಯಿಂದಾಗಿ ಹಣದುಬ್ಬರ ಕೂಡ ಹೆಚ್ಚಾಗಲಿದ್ದು, ರೂಪಾಯಿ ಇನ್ನಷ್ಟು ದುರ್ಬಲಗೊಳ್ಳಲಿದೆ. ಇಷ್ಟಲ್ಲದೆ ಕಂಪನಿಗಳ ಆಮದು ವೆಚ್ಚ ಹೆಚ್ಚಾಗಲಿದ್ದು, ಲಾಭದ ಪ್ರಮಾಣವು ಇಳಿಕೆಯಾಗಲಿದೆ.
ಸೋಮವಾರ ಆರಂಭಂಕ ವಹಿವಾಟಿನಲ್ಲಿ ಬ್ರೆಂಟ್ ಕಚ್ಚಾ ತೈಲ ಬೆಲೆ 2% ಕ್ಕಿಂತ ಹೆಚ್ಚು ಏರಿಕೆಗೊಂಡಿದ್ದು ಪ್ರತಿ ಬ್ಯಾರೆಲ್‌ಗೆ $79ರಲ್ಲಿ ವಹಿವಾಟು ನಡೆಸಿದೆ. ಇರಾನ್ ನ್ಯೂಕ್ಲಿಯರ್ ಸೌಲಭ್ಯಗಳ ಮೇಲೆ ಅಮೆರಿಕಾ ಶನಿವಾರ ದಾಳಿ ನಡೆಸಿದ ಬಳಿಕ ಪರಿಸ್ಥಿತಿ ಇನ್ನಷ್ಟು ಉದ್ವಿಗ್ನಗೊಂಡಿದೆ.
ಇದೇ ವೇಳೆಯಲ್ಲಿ ಭಾರತದ ರೂಪಾಯಿ ಯುಎಸ್ ಡಾಲರ್ ಎದುರು ಸೋಮವಾರ ಆರಂಭಿಕ ವಹಿವಾಟಿನಲ್ಲಿ 17 ಪೈಸೆ ಇಳಿಕೆಗೊಂಡು 86.72 ರೂಪಾಯಿಗೆ ವಹಿವಾಟು ನಡೆಸಿದೆ.
4) ಡಾಲರ್ ಸೂಚ್ಯಂಕ ಏರಿಕೆ
ಭಾರತದ ಷೇರುಪೇಟೆಯಲ್ಲಿ ಡಾಲರ್ ಸೂಚ್ಯಂಕವು ಅರ್ಧ ಪರ್ಸೆಂಟ್‌ನಷ್ಟು ಏರಿಕೆಗೊಂಡಿದೆ. ಡಾಲರ್ ಸೂಚ್ಯಂಕ ಏರಿಕೆಯಿಂದಗಿ ವಿದೇಶಿ ಬಂಡವಾಳ ಹೊರಹರಿವು ಹೆಚ್ಚಾಗುವ ಭಯ ಸೃಷ್ಟಿಯಾಗಿದೆ. ಇರಾನ್-ಇಸ್ರೇಲ್ ಸಂಘರ್ಷದಲ್ಲಿ ಯುಎಸ್ ಪ್ರವೇಶವು ಮಧ್ಯಪ್ರಾಚ್ಯದಲ್ಲಿ ಉದ್ವಿಗ್ನತೆಯನ್ನು ಮತ್ತಷ್ಟು ಹೆಚ್ಚಿಸಿದ್ದು, ಹೂಡಿಕೆದಾರರು ಸುರಕ್ಷಿತ ಹೂಡಿಕೆಗಳತ್ತ ಮುಖಮಾಡಿದ್ದಾರೆ.
5) ಭಾರತದ ಬೆಳವಣಿಗೆಯ ವೇಗಕ್ಕೆ ಹೊಡೆತ ಬೀಳಲಿದೆ
ಹೌದು, ಮಧ್ಯಪ್ರಾಚ್ಯದಲ್ಲಿನ ಇರಾನ್-ಇಸ್ರೇಲ್ ಸಂಘರ್ಷವು, ಅಮೆರಿಕಾದ ಯುದ್ಧ ಪ್ರವೇಶದಿಂದಾಗಿ ಕಚ್ಚಾ ತೈಲ ಬೆಲೆ ಏರಿಕೆ ತೀವ್ರಗೊಳ್ಳತ್ತಿದೆ. ಹೀಗಿರುವಾಗ ವಿಶ್ವದಲ್ಲೇ ಅತ್ಯಂತ ವೇಗವಾಗಿ ಬೆಳೆಯುತ್ತಿರುವ ಆರ್ಥಿಕತೆಯಾಗಿರುವ ಭಾರತಕ್ಕೆ ಹಾಗೂ ಜಾಗತಿಕ ಆರ್ಥಿಕತೆಗೆ ಹೊಡೆತ ಬೀಳಲಿದೆ.
ರಷ್ಯಾ-ಉ್ರನ್ ನಡುವಿನ ಯುದ್ಧವು ಈಗಾಗಲೇ 2 ವರ್ಷ ಕಳೆದಿದ್ದು ಇದಾದ ಬಳಿಕ ಇಸ್ರೇಲ್-ಹಮಾಸ್ ಯುದ್ಧ ಅಲ್ಲದೆ, ಭಾರತ-ಪಾಕಿಸ್ತಾನ ಸಂಘರ್ಷ, ಇದೀಗ ಇರಾನ್-ಇಸ್ರೇಲ್ ಯುದ್ಧ ಸತತವಾಗಿ ಜಾಗತಿಕ ಆರ್ಥಿಕತೆ ಮೇಲೆ ಹಾಗೂ ಭಾರತದ ಆರ್ಥಿಕ ಬೆಳವಣಿಗೆ ವೇಗಕ್ಕೆ ತಡೆಯೊಡ್ಡಿದೆ.
ಇಷ್ಟಲ್ಲದೆ ಯುಎಸ್‌ನಲ್ಲಿ ಡೊನಾಲ್ಡ್‌ ಟ್ರಂಪ್‌ ಸುಂಕಗಳನ್ನು ತಗ್ಗಿಸಲು ಭಾರತ ಸೇರಿದಂತೆ ಹಲವು ರಾಷ್ಟ್ರಗಳು ಪ್ರಯತ್ನಿಸುತ್ತಿವೆ. ಯುಎಸ್ ಅಧ್ಯಕ್ಷ ಟ್ರಂಪ್‌ ತನ್ನ ಟ್ರೇಡಿಂಗ್‌ ಪಾರ್ಟ್‌ನರ್‌ಗಳಿಗೆ ಪ್ರತಿ ಸುಂಕ ವಿಧಿಸುವ ಮೂಲಕ ದೊಡ್ಡ ತಲೆನೋವಾಗಿ ಪರಿಣಮಿಸಿದ್ದಾರೆ.