ಗತವೈಭವಕ್ಕೆ ಮರಳುತ್ತಿದೆ ಅನಿಲ್‌ ಅಂಬಾನಿ ಷೇರು; ಸಾರ್ವಕಾಲಿಕ ಗರಿಷ್ಠ ಮಟ್ಟ ತಲುಪಿದ ರಿಲಯನ್ಸ್‌ ಪವರ್‌ ಸ್ಟಾಕ್‌..!

Anil Ambani Stocks: ಭಾರತೀಯ ಷೇರುಮಾರುಕಟ್ಟೆ ಸೋಮವಾರ (ಜೂನ್ 2) ವಹಿವಾಟಿನಲ್ಲಿ ತೀವ್ರ ಏರಿಳಿತದ ನಂತರ ರೆಡ್‌ಮಾರ್ಕ್‌ನಲ್ಲಿ ವಹಿವಾಟು ಮುಗಿಸಿದೆ. ಸೆನ್ಸೆಕ್ಸ್‌ 77 ಪಾಯಿಂಟ್ಸ್‌ ಇಳಿಕೆಯೊಂದಿಗೆ 81,373ರಲ್ಲಿ ಮುಚ್ಚಿದೆ. ನಿಫ್ಟಿ ಕೂಡ 34 ಪಾಯಿಂಟ್ಸ್‌ ಏರಿಕೆಯೊಂದಿಗೆ 24716ರಲ್ಲಿ ಮುಚ್ಚಿದೆ.

ಆದರೆ, ಮಾರುಕಟ್ಟೆ ಕುಸಿತದ ನಡುವೆಯೂ ಪ್ರಮುಖ ಕೈಗಾರಿಕೋದ್ಯಮಿ ಮತ್ತು ಮುಖೇಶ್ ಅಂಬಾನಿ ಅವರ ಸಹೋದರ ಅನಿಲ್‌ ಅಂಬಾನಿ ಒಡೆತನದ ‘ರಿಲಯನ್ಸ್ ಪವರ್’ ಷೇರುಗಳು ಭರ್ಜರಿ ಜಿಗಿತ ದಾಖಲಿಸಿವೆ. ಸತತ ಮೂರನೇ ಸೆಷನ್‌ನಲ್ಲೂ ಏರಿಕೆಯ ಟ್ರೆಂಡ್ ಮುಂದುವರಿಸಿದೆ.

ಇಂದು ಸೋಮವಾರ ಒಂದು ಹಂತದಲ್ಲಿ ಷೇರುಪೇಟೆಯು ಶೇ.8 ರಷ್ಟು ಏರಿಕೆಯೊಂದಿಗೆ ₹62.80ಕ್ಕೆ ತಲುಪಿತ್ತು. ಇದು ಈ ಷೇರಿನ 52 ವಾರಗಳ ಗರಿಷ್ಠ ಮಟ್ಟವೂ ಆಗಿದೆ. ದಿನದ ಅಂತ್ಯಕ್ಕೆ ಶೇ.5.96ರಷ್ಟು ಏರಿಕೆಯೊಂದಿಗೆ ₹61.56ರಲ್ಲಿ ವಹಿವಾಟು ಮುಗಿಸಿದೆ.

ರಿಲಯನ್ಸ್ ಪವರ್ ಷೇರುಗಳು ಕಳೆದ ಒಂದು ವಾರದಲ್ಲಿ ಶೇ.21 ಕ್ಕಿಂತ ಹೆಚ್ಚು ಏರಿಕೆ ದಾಖಲಿಸಿವೆ. ಕಳೆದ ಒಂದು ತಿಂಗಳಲ್ಲಿ ಶೇ.53ರಷ್ಟು ಏರಿಕೆ ದಾಖಲಿಸಿವೆ. ಕಳೆದ ಮೂರು ತಿಂಗಳಲ್ಲಿ ಶೇ.85 ರಷ್ಟು ಏರಿಕೆ ಕಂಡಿವೆ. ಈ ವರ್ಷದ ಆರಂಭದಿಂದ ಶೇ.38 ಕ್ಕಿಂತ ಹೆಚ್ಚು ಏರಿಕೆ ಕಂಡಿರುವ ಷೇರುಗಳು ಕಳೆದ ಒಂದು ವರ್ಷದಲ್ಲಿ ಶೇ.151 ರಷ್ಟು ಏರಿಕೆಯಾಗಿ ಮಲ್ಟಿಬ್ಯಾಗರ್ ರಿಟರ್ನ್ಸ್ ನೀಡಿರುವುದು ಗಮನಾರ್ಹ.

ಬೃಹತ್ ಯೋಜನೆಯನ್ನು ಸ್ವಾಧೀನಪಡಿಸಿಕೊಂಡ ಕಂಪನಿ.
ರಿಲಯನ್ಸ್ ಪವರ್ ಷೇರುಗಳಲ್ಲಿನ ಈ ಅಸಾಧಾರಣ ಬೆಳವಣಿಗೆಗೆ ಮುಖ್ಯ ಕಾರಣವೆಂದರೆ ಬೃಹತ್‌ ನವೀಕರಿಸಬಹುದಾದ ಇಂಧನ ಯೋಜನೆಯ ಸ್ವಾಧೀನಪಡಿಸಿಕೊಂಡಿದೆ.

ಮೇ 28 ರಂದು, ರಿಲಯನ್ಸ್ ಪವರ್ ಅಂಗಸಂಸ್ಥೆ ರಿಲಯನ್ಸ್ NU ಎನರ್ಜೀಸ್ ಪ್ರೈವೇಟ್ ಲಿಮಿಟೆಡ್ (ರಿಲಯನ್ಸ್ NU ಎನರ್ಜೀಸ್) 350 MW ಅಂತರ-ರಾಜ್ಯ ಪ್ರಸರಣ ವ್ಯವಸ್ಥೆ (ISTS)-ಸಂಪರ್ಕಿತ ಸೌರಶಕ್ತಿ ಯೋಜನೆಗಾಗಿ ನವರತ್ನ ಸ್ಥಾನಮಾನ ಹೊಂದಿರುವ SJVN ನಿಂದ LOA ಪಡೆದಿರುವುದಾಗಿ ಘೋಷಿಸಿದೆ. ಇದಲ್ಲದೆ, 175 MW/700 MWh ಬ್ಯಾಟರಿ ಎನರ್ಜಿ ಸ್ಟೋರೇಜ್ ಸಿಸ್ಟಮ್ (BESS) ಅನ್ನು ಸಹ ಸ್ವಾಧೀನಪಡಿಸಿಕೊಂಡಿದೆ.

ಈ ಯೋಜನೆ ಪೂರ್ಣಗೊಂಡ ನಂತರ, ರಿಲಯನ್ಸ್ ಪವರ್‌ನ ಪೋರ್ಟ್‌ಫೋಲಿಯೊಗೆ 600 MWh ಸೌರ DC ಸಾಮರ್ಥ್ಯ ಮತ್ತು 700 MWh BESS ಸಾಮರ್ಥ್ಯವನ್ನು ಸೇರಿಸುತ್ತದೆ. ಇದು ಕಂಪನಿಯ ಒಟ್ಟಾರೆ ಶುದ್ಧ ಇಂಧನ ಪೈಪ್‌ಲೈನ್ ಅನ್ನು 2.4 GW ಸೌರ DC ಸಾಮರ್ಥ್ಯ ಮತ್ತು 2.5 GWh ಗಿಂತ ಹೆಚ್ಚಿನ BESS ಸಾಮರ್ಥ್ಯಕ್ಕೆ ಕೊಂಡೊಯ್ಯುತ್ತದೆ, ಇದು ಭಾರತದಲ್ಲಿ ಸಮಗ್ರ ಸೌರ + BESS ವಿಭಾಗದಲ್ಲಿ ಅತಿದೊಡ್ಡ ಪ್ಲೇಯರ್‌ ಆಗಲಿದೆ.

ದೀರ್ಘಾವಧಿಯ ಆದಾಯದ ವಿಷಯದಲ್ಲಿ, ಕಳೆದ ಎರಡು ವರ್ಷಗಳಲ್ಲಿ ರಿಲಯನ್ಸ್ ಪವರ್‌ನ ಷೇರು ಬೆಲೆ ಶೇ.370 ರಷ್ಟು ಏರಿಕೆಯಾಗಿದೆ. ಕಳೆದ ಐದು ವರ್ಷಗಳಲ್ಲಿ ಇದು ಶೇ. 2800 ರಷ್ಟು ಅದ್ಭುತ ಫಲಿತಾಂಶ ನೀಡಿದೆ. ಅನಿಲ್ ಅಂಬಾನಿ ಗ್ರೂಪ್‌ ಒಂದು ಕಾಲದಲ್ಲಿ ಬಿಕ್ಕಟ್ಟಿನಲ್ಲಿ ಸಿಲುಕಿದ್ದರೂ, ರಿಲಯನ್ಸ್ ಪವರ್ ತನ್ನ ನವೀಕರಿಸಬಹುದಾದ ಇಂಧನ ಯೋಜನೆಗಳೊಂದಿಗೆ ತನ್ನ ಗತವೈಭವದತ್ತ ಹೆಜ್ಜೆ ಹಾಕುತ್ತಿದೆ ಎಂಬುದನ್ನು ಈ ಅಂಕಿಅಂಶಗಳು ಸ್ಪಷ್ಟಪಡಿಸುತ್ತವೆ.